Bodach an Chóta Lachtna: eagrán nua

Abstract

Tá prós na Nua-Ghaeilge Moiche (c. 1200–1650) ar na réimsí is lú de litríocht na Gaeilge a ndéantar staidéar ná plé orthu. Príomhaidhm an tráchtais seo is ea dul i ngleic leis an mbearna seo sa léann trí eagrán scolártha den scéal fianaíochta Bodach an Chóta Lachtna a chur ar fáil. Scéal é seo a bhaineann le deireadh thréimhse na Nua-Ghaeilge Moiche agus a áirítear i measc na scéalta sin ar a dtugtar ‘scéalta rómánsacha’ de ghnáth. Tá an téacs ar marthain in os cionn leathchéad lámhscríbhinn a breacadh idir tús an ochtú haois déag agus deireadh an naoú haois déag agus is ar an gcóip is luaithe díobh sin, atá ar caomhnú i lámhscríbhinn 23 M 23 (340) in Acadamh Ríoga na hÉireann, atá an t-eagrán seo bunaithe. Déantar plé iomlán ar thraidisiún lámhscríbhinne an scéil, ar an teanga inar cumadh é agus ar a chomhthéacs liteartha. Déantar iarracht dáta a luath leis an téacs chomh maith, ag tarraingt ar fhianaise lámhscríbhinne, ar fhianaise inmheánach an téacs agus ar fhianaise na teanga. Tugtar suntas sa saothar seo do choincheap an scríobhaí-eagarthóra agus cuirtear sleachta de leaganacha imeallacha den scéal in eagar sna haguisíní mar shampla de thionchar scríobhaithe indibhidiúla ar sheachadadh an téacs.