Estraga-festas divertidas: O humor como ferramenta de resistencia no audiovisual galego feminista

Abstract

Tal como afirma Juan F. Egea, a comedia xoga un rol importante ao facernos reflexionar sobre cuestións de xustiza social se consideramos «not what causes laughter but rather what laughter causes in us» (2013: 28). Como unha forza importante nas artes (Cundall 2007: 203), o humor pode provocar, incomodar e concienciar, o que resulta especialmente evidente no contexto da produción audiovisual. O propósito deste capítulo é examinar o papel do humor como ferramenta de resistencia no audiovisual galego feminista e, para tal fin, enfocámonos na web serie Monstras (Corentena Producións, 2020), de Eire García Cid, unha obra na que o humor desafía as normas e as expectativas patriarcais para chamar atención sobre a violencia de xénero. Deste xeito, pódense identificar varias estratexias de humor feminista presentes na serie, desde a dilución da tensión, ata a reivindicación do grotesco corporal ou a parodia das normas.