Téama na Saoirse i bhFicsean Phádraig Uí Chíobháin

Abstract

Is é atá sa tráchtas seo ná staidéar ar an léiriú a dhéanann Pádraig Ó Cíobháin, scríbhneoir comhaimseartha, ar théama na saoirse ina chuid úrscéalta agus gearrscéalta. Tá trí chaibidil sa tráchtas, agus déanaim anailís ar ghné ar leith de théama na saoirse i ngach ceann díobh. I gCaibidil 1, iniúchaim an cur síos a dhéanann Ó Cíobháin ar áiteacha is spásanna ar leith ina chuid scéalta. Déanaim scagadh go háirithe ar na bealaí éagsúla a dtéann na timpeallachtaí seo i gcion ar a chuid carachtar. Léirím go dtugann plé an údair ar an tionchar seo léargas dúinn ar an tuiscint atá aige ar an rud is saoirse ann. I gCaibidil 2, scrúdaím an plé a dhéanann Ó Cíobháin ar chúrsaí creidimh ina shaothar. Taispeánaim go dtugann mórán dá chuid scéalta le fios go gcuireann an Eaglais Chaitliceach srian le saoirse daoine. Déanaim cíoradh freisin ar an gcuntas a thugann Ó Cíobháin ar fheiniméan an tsaoltachais. Léirím go bhfuil dlúthbhaint ag an bhfeiniméan sin le hiarrachtaí a chuid carachtar a bheith saor ó thionchar díobhálach na hEaglaise. Is le ceist na hinscne a théim i ngleic i gCaibidil 3 den tráchtas. Iniúchaim an léiriú a dhéanann Ó Cíobháin ar fheiniméan na hinscne chomh maith lena phlé ar fheiniméan an ghnéis. Déanaim anailís ar na rudaí éagsúla a chuireann srian le saoirse na mban agus le saoirse na bhfear faoi seach ina chuid scéalta. Tá tras-scríbhinn leasaithe d’agallamh a rinne mé le Pádraig Ó Cíobháin in 2017 curtha ar fáil agam san aguisín atá ag deireadh an tráchtais.